((( حب فى المليان )))

من غير كُتر كلام

ولا ازيك .. وحشتينى 

ولا نظرة عتاب .. تكوينى

ولا تنهيدة حايرة

فى وسط السلام

تشجينى

بحبك

وده كل اللى كان

ايوه بحبك من زمااان

لما كنت بحلم بالنجوم

وارتمى فى حضن الخيال

كنت برسم على الورق

عيون بريئة

عيون حزينة

عيون مخلوقة من الجمال

كنت بكتب القصيدة

الحرف يشعر بالأمان

كنت لما اشوفك صدفة

ياااااااااااااه

مش عارف أوصف

غير إنى بكون ...إنسان

تحلى كل الدنيا فى عنيا

وكأنى ملك

فى دنيا بلا أحزان

سهل قوووى

أقولك بحبك

لكن الشعور لما يتوجد

يبقى الكلمة طالعة

فى المليان

بحبك .. بحبك

والكلمة حايرة

مش عارفه

تروح لمكان

كمال ربيع على

14/2/ 2016

((( صرخة ميت )))

مالك إيه فيك ؟

ليه دايما حاسس بالملل

الكل باعك

ومعدتش حد مشتريك

مفيش ابتسامه

ولا موقف شهامة

ولا حتى بحور الكون

من العطش ترويك

مالك يا صديق ؟

الكل حاسس بضيق

ضلمه و حواجز مالية الطريق

وصرخات آهااات الموجعين

والكل فى الهم غريق

سهران بتتفرج على البشر

فلان من الغربة اتقهر

وفلانه مستنيه اللى غايب

امتى يرجع من السفر

عمال تطمن فى الولاد

بكرا جاااي

بكرا يجي يحكى الحكاوى

ونضحك سوا على أيام السفر

ويجي بكرا

وبعده ألف ألف بكرا

لا يوم حكينا الحكاوى

ولا يوم فرحنا زى البشر

الغربة مره

وأسوأ ما فيها

الغربة جوه الوطن

أنزل الشارع

أدور على وشوش الفرحانين

مش لاقى غير ناس

من كتر الفكر تايهين

راميين بلاهم على الشوارع

لا قادرين يصيروا وحوش

ولا قادرين يرجعوا طيبين

حتى الحلق فيه غصة

مين يا صرخة  يطلعك

بركااان بيغلى من سنين

خايف .. طب ليه

ومن مين خايف ؟

أصرخ

وصحى كل الميتين

اللى تحت الارض

واللى عايشين بالملايين

الكل خايف من الكلاب

صوت النباح

فرق ثبات الخاشعين

صوت النباح

شق فجر الحالمين

يا ترا مخبى ايه يا بكرا

رحمتك

يارب العالمين

كمال ربيع على

5/ 2/ 2016

((( تنهيدة ذكريات)))

تجتاحنى نوبات شوق همجية

أرانى أقلب فى قلبى الصفحات

فتصحوا جمرات الذكريات

كانت لأنثى شرقية

بقايا العطر على ملابسى

وطعم آخر القبلات

نظراتها الحائرة بحثاً عنى

وإلتفاتتها عندما تراني

فترقص فى عينيها النظرات

ترتسم على وجهها أبتسامة

توقظ أشعة الفجر

وتملأ الكون أبتهالات

تجرى بلهفة تجاهى

ولا تبالى بهؤلاء المتطفلات

ترتمى فى أحضانى زهواً

فيذوب الثلج المعتق فى صدرى

ويعود القلب يرقص بالنبضات

تخرج تنهيدة

قوية الزفرات

يتطاير على أثرها

كل الأقاويل والإشاعات

وتبدو حبيبتى كعروس

تُزف فوق النجوم وبين الغيمات

يشهد عُرسها الفضائيون

وتتوهج من أجلها المجرات

ليتنى أبقيتها معى..

وما التفت إلى تقاليد وعادات

فلتسقط الأعراف

ولتسقط الأقنعة المزيفة

وليبقى حبى دائماً

مهما كانت النهايات

كمال ربيع على

1/ 2/ 2016