قبل ما نقول كنا
ونقول الزمان تعبنا
ونعيش ندور على دليل
مين فينا باع التانى
ومين فينا كان قتيل
انا بعلنها صراحة
انا من حبك مستقيل
كنت زى الطير
المسافر
بعشق النسمة وأطير
برسم حدود للشوق
واكسر كل الحدود
وما عرفت يوم مستحيل
اصل حبى ليكى مكنش
عادى
هستيريا المشاعر والسعادة
النوم فى محرابك كان
عباده
وكونى أنى جزء منك
اصله فى الاصل
مثير .... واستجابه
كله ده مكنش عادى
لكن لما بصيت فـ عنيكى
ولمحت طيفى بينزوى
قلت المس بسرعه ...
ايديكى
يمكن اكدب عنيكى
لكنى لحظة ما لمستك
عرفت يعنى ايه عادى
يعنى ايه برودة
مشاعر
والحلم اللى بينا
سافر
والنظرة اللى كانت بتنور
الكون
صارت شمعه فى فانوس
مكسور
خلاص بقى عادى
انك تروح متجيش
بقى عادى
لما تسألنى مالك
هاقولك مفيش
لا كتير ولا قليل
بس من حبك أنا
صرت مستقيل
كمال ربيع على
12 / 6 /2015
ليست هناك تعليقات:
إرسال تعليق