(((
أنـا خــايف )))
نفسى اضمك يا بلدى
بس خايف من الفراق
خايف من أيادى خفية
وبحور كدب وبلطجية
واجندات مليانه
هم
متلوثة بالـدم
من كتر الغم مش
عارف
عربية ولا اجنبية
خايف من جيرانى
وابن بلدى
وقعدة العصرية
والتسالى فى المغربية
وخطوط حمرا عنادية
خايف اكون غيرى
وعنيا مغمية
خايف من الضمير يموت
ويندبح فينا السكوت
والاقى الكلمة منسية
واكتب عن جمال بلدى
وما اشفهوش غير نقطة
فى بحور غربية
وخايف اقول بحبك
يرد صدى صوتى
بحبك بحبك بحبكككك
باللفظ مش بالنية
والاقى نفسى حجر
والمشاعر عدوانية
وكل ما اكتب أمل
تجرى الدموع عفوية
اسمع أنين مصر
ابكى على الاغنية
وارسم بشاير سلام
واتوه فى احلام وردية
يدق باب البيت
بصورة همجية
ليه يا بشر ما انتوش بشر
وليه ماشيين عكس القدر
وليه صارت حياتكم ضجر
دى البسمة اجمل دفاع
لو شافها العدو يتقهر
نفسى اضمك يا بلدى
بس بينى وبينك سفر
بينى وبينك عقول فاسدة
وكراسى واشباه بشر
ده حتى احلام البريئة
هربت من كتر السهر
وكيف انام وانا كل وجع
ممنوع عليا اقول آه
والآهه عايزه تصرخ
نفسى اضمك يا بلدى
وابكى على كتفك
بس خايف
أنا خايف
كمال ربيع على
18 /10/ 2013
ليست هناك تعليقات:
إرسال تعليق